, Woehry Claudia

D4: Ändlech widermau es 3:0!

Im zwöitletzte Spiel vo dere Saison si mir in Halten z’Gast. Die letzte 4 Spiel si aui sehr intensiv gsi und 3 vo dene si über 5 Sätz gange. Ir Vorrundi hets gäge Halten ou e 5 Satz-Krimi gä, hüt wei mirs aber churz und knackig dürebringe.

Mittwoch, 08.03.2023 – VBC Halten – Vopap D4 (23:25 / 22:25 / 21:25)

Und mir hei üses Ziel erreicht! D’Satzresultat si aui relativ knapp und ähnlech, dr Spiuverlouf aber gar nid.Im erste Satz isch es es hin und här. Mir chöi am Afang es paar Pünkt i Füehrig ga, Halten überholt üs ir Mitti vom Satz und gäge Schluss chöi mir nomau chli ufdräihe und dä Satz hole.

Im zwöit Satz starte mir sehr bescheide und grate früeh in Rückstand. Bim zwöite Time-out si mir 9:17 im Rückstand. Aber verlore isch da no nüt! Mir mache Punkt um Punkt und drmit üse Gägner langsam nervös. So hole mir ou dr zwöit Satz mitere spektakuläre Ufholjagd.

Und im dritte löh mir nähr nüm viu la abrönne. Mir zieh drvo und hei dä Satz scho fasch uf sicher. Aber irgendwie het itz Halte plötzlech wider es Höch und chunnt üs nomau nöcher – aber es längt ihne de doch nüm ganz. 25:21 für üs und somit es 3:0! Yeah! 

Z’letzte Spiu gäge VBC Lützelflüeh am Donnstig, 16.3. im Rain wird heiss – es geit um d’Wurst (oder besser gseit ume Ufstieg id 3. Liga!) Wer hätte das gedacht… go Flingos!