, Zeiter Sandrine

Z Damu 2 beändut d Vorrundi uf Rang 3 :)

Dr letscht Match faner Vorrundi het iisch uf Konolfingu zum letschtu Üfstiigerteam gfiährt. Wiä Strättligu sind öi schii diräkt üfgstigu und drum siiwer da sicher öi nu gspannter gsi, was iisch erwartut. Bim Ischlah hetmu schich doch vellicht öi d Frag gstellt, wiso dass Konolfingu iner Ranglischta so wiit hinnina isch. Aber z Ischlah seit ja nu nid vill uber dr Matchverlöif üs, schliässlich steit und kiit alls mit dr Anahm und dr Defense.

 

Spannundä erschtä Satz

Uf beidnä Siitä isch güät gstartut wordu. Wiär hei mal im Service chännu punktu, de widr im Agriff, abr öi fa ihrusch Siita isch so einiges zrugg cho. Und z Ischlah am Afang het nid gitüüscht. Um so verwunderlicher, sind schii iner Tabälla so wiit zrugg. Iner Mitti fam Satz hennt schii de nu z Päch kä, dass schich än Spilerin verletzt het. Güäti Besserig an discher Stell! Das het de än chliinä Unnerbruch gigäh. Wichtig also, dass d Konzentration hoch plibt, und wer iisch nid dadurch läh la drus bringu. De is de doch wiiter gangu und s isch immernu knapp und üsgiglichu gsi. Plötzlich hennt aber de schii paar Pinkt meh chännu machu und s het gheissu: 22:23. Sehr knapp und s hätti uf beidi Siitä chännu kijiu. Mit starchä Närvä am Service heiwer aber de chännu Punkt ver Punkt güät machu und am Schluss dr Satz ver iisch chännu entscheidu.

 

Dr Ibruch

Ich weiss öi nid wiso, abr fascht jedä Match heiwer sonä blödä Ibruch. Ich weiss nid, obwer  z uberhäblich sii gsi, odr alls z locker gnu hei, aber plötzlich isch nimmä vill gangu. D Frouä fa Konolfingu hennt üfgidräit und zittuwiis bis zu 7 Pinkt Vorsprung kä. Da müäss mal widr meh cho. De isch de d Eva anä Service cho und het mal widr än chliini Serie chännu startu. Punkt ver Punkt heiwer so chännu üfholu, aber am Schluss hets de leider nur bis zum 20:25 glängt.

 

D Üfholjagd

Im drittu Satz isch dr Start mal widr än Katastropha gsi. Konolfingu isch drfa gizogu und wiär hei ziimli Miäh kä, mitzcho. Bim Stand fa 16:21 heiwer de öi iischers zweit Timeout miässu näh. Das het de än liächti Steigerig zur Folg kä, bis de d Anja anä Service isch cho. Wiä so oft isch än Service-Serie iischi Rettig gsi. Will so heiwer chännu üfholu und sii zumnä Satzball cho, 24:23. Der heiwer aber leider nid chännu verwärtu. Der Satz isch an Spannig fascht nimmä z uberbiätu gsi. Dr zweit Satzball heiwer de ändlich chännu verwärtu.

 

Dr Schluss

Satz Nummer viär het ver iisch besser agfangu. Hei immer äs paar Pinkt Vorsprung kä und hei nid nur im Service, sondern öi am Agriff odr am Block chännu punktu. D Defense isch dr ganz Match uber scho vill besser gsi als öi scho. Gägu Schluss is abr wiä immer numal spannund wordu. Wiär chännä ja dr Match nid annersch üfheru als inä erschtu Sätz. Wiär hei abr de d Närvä chännu bhaltu und hei mit 25:22 dr Sack züägmacht und di negschtu 3 Pinkt gholt.

 

Fazit

Was ver än Vorrundi! Vill besser als di meischtu fa iisch erwartut hennt, beändä wer schi ufum 3. Platz. Das heisst aber nid, dasswer iisch jetz üsriäwä. Wiär miässä wiiterhin an iisch schaffu und vor allum iischi Eigufähler und Teifs prubiäru üszmärzu. Hättiwer äs paar weniger kä, hättiwer sicher nu dr eint oder anner Punkt meh chännu erziilu und das soll wiiterhin z Ziil sii. Schliässlich heiwer iner Rückrundi nu mit äs paarnä Teams än Rächnig offu. ;)

 

Wiä immer:

Merci Marc ver diis Coaching.

Merci iischä Fans fa mitgreist sind und iisch immer unnerstützund.

 

Mit faner Partie sind gsi: Marc (Coach), Ursi (Captain), Noémi (Libera), Kati, Martina, Eva, Steffi, Maruschka, Sarah, Sandra, Monique, Anja und Sandrine.