, Zeiter Sandrine

Mit dr Sarah isch d Wändi cho ;)

Am 13. Dezember heiwer iisch ufä Wäg nach Strättligu gmacht. Der Match isch mit sehr vill Spannig erwartut wordu, kennäwer doch iischi Gägnerinnä nur all zu güät, genau so wiä d Halla. Hiä heiwer schliässlich scho äs paar Spil kä und nid immer sind di güät üsgangu ver iisch. Interessant ischs einersiits gsi, will schii iner letscht Saison als klarä Leader diräkt üfgstigu sind und andrersiits uf Grund faner Tabälluposition. Wiär spilä definitiv vorna mit, was ihnu nu nid so glingt. Bim Iträffu iner Halla heiwer gmerkt, dass schich z Team nid wirkli gändrut het.

 

Satz Nummer 1

Wiär sii nid wirklich güät in der erscht Satz gstartut. Vellicht is d Nervosität gsi, vellicht sind schii denn öi besser gsi, mu weisses nid. Bim Stand fa 1:6 üs iischer Sicht het de das öi zumnä Timeout gfiährt. Nach dem heiwer zwar de doch ab und züä än Punkt chännu machu, schii aber leider öi und das het de zumnä Punktvorsprung fa ziituwiis 6 Pinkt gfiährt. Das chännäwer iisch doch nid la gfallu. Da müäss unbedingt meh cho fa iisch. Wiär hei de wellu üfholu, vor allum öi, dasswer widr äs bessers Gfühl berchämä. Das isch iisch aber leider nid wirkli glungu und wiär hei iisch miässu zu 20 gschlagu gäh.

 

D Stund faner Sarah

Im zweitu Satz isch dr Start ganz annersch gsi. Wiär sii immer eis zwei Pinkt vorüs gsi und hei iisch klar fa dem erschtu erholt. Das isch so lang güät gangu, bis Mitti Satz. Plötzlich hennt schii widr meh Gas gigäh und wiär hei widr meh Eigufähler igibuut. Nid erstüünlich, hets plötzlich gheissu: 18:23. Denn isch aber d churz vorer igwächslut Sarah anä Service cho, nachdem schii scho vorer dr Wichtig Punkt im Agriff het gmacht. Und was het di ver än Service üsgipackt! Punkt ver Punkt ver Punkt het schii güät gmacht und wiär sii ändlich widr inäs Fiir cho. Isch de doch mal än Ball zrugg cho, heiwers de am Netz greglut. Aber das heiwer nid wirkli vill miässu. Äs Ass hiä, än Servicewinner da, d Sarah het der Satz gad quasi im Alleingang entschidu und so heiwer de schliässlich doch mit 25:23 chännu gwinnu. Bravo Sarah!! :)

 

Dr Ibruch

Das Fiir heiwer de gad wellu mitnäh. Aber äs isch mal widr einä fa denu berüähmtu Ibrich cho. 4:12, das isch äs rächt klars Verdikt. Das welläwer aber nid uf iisch la sitzu. Wiär hei de zwar widr äs paar Pinkt chännu machu, aber schii leider öi. Nachum zweitu Timeoutbi 7:16 isch aber de wird än chliini Wändi cho. Ditz Mal isch zwar nid d Sarah anä Service cho, sondern d Eva, abr di het mindeschtens genau so güät serviärt wiä d Sarah in Satz zwei. Punkt ver Punkt heiwer so widr chännu üfholu und üsumä 7:16 isch plötzlich "nurnu" äs 12:16 und später de äs 15:17 gsi. Wiär hei iisch also widr zrugg gikämpft und hei der Elan mitgnu. D Gägnerinnä hingägu sind mal widr inä Negativspirala cho. Das het de gad glängt, dass wiär hei chännu dr Satzgwinn mit 25:23 verbüächu.

 

Di gälb Charta

Dr viärt Satz isch de ganz annersch gsi. Wiär sii vill besser gstartut, hei widr paar Pinkt chännu drfa ziäh und hei iisch nimmä wellu la iholu. Aber öi schii hennt nu nid üfgigäh und hennt Punkt um Punkt güät gmacht. Nid verwunderlich, sind de bi stritigä Situationä und teilwiis speziellä Schidsrichter-Entscheidä d Emotionä hochkocht. Vor allum, willwer halt z Gfühl hei kä, äs wärdi nid wirkli üsgiglichu entschidu. So hennt halt d Strättligerinnä nu neecher chännu cho. 23:21 hets de gheissu, wa d Emotionä de doch äs bitzji z vill sind gsi und dr Marc schich änd gälbi Charta het gholt. "Dr Marc machu" isch sithär z eint odr anner Mal z kehru gsi. ;) Das het aber de wäder bim Gägner nu bi iisch gross eppis gändrut und wiär hei iisch am Schluss mit 25:22 di negschtu drii Pinkt chännu la güät schriibu.

 

Fazit

Was ver än Kampf! Und das mal widr in der chlii Halla, wa iisch nid wirkli immer so ligt. Wiär hei än güäti Teamleischtig gizeigt, hei iisch gägusiitig chännu puschu, und das miässäwer unbedingt nutzu, de gsehtis am Schluss faner Vorrundi gar nid so schlächt üs:)

 

Wiä immer:

Merci Marc ver diis Coaching wa zum Glick nid zum 22:23 gfiährt het;)

Merci Julie bisch dü mal widr mitgreist :)

 

Mit faner Partie sind gsi: Marc (Coach), Ursi (Captain), Noémi (Libera), Kati, Martina, Eva, Steffi (chrank ufum Bänkli), Maruschka, Sarah, Sandra, Monique, Anja und Sandrine.