> Zurück

U23A: E guete Start i die neui Saison!

Heller Naomi 23.10.2017

Am späte Donnstiabe si mir mitem Spiu gäge Thun i die nöii Saison gstartet. Nöi isch aber nid nume d Saison gsi, sondern o üses Team: grad mau drü Spilerinne vom letschte U23A si no derbi, derfür sehr viu Nöii u d Ushilfspilerinne vor U19. Es isch drum nid erstuunlech gsi, heimer im erste Satz chli Ziit brucht, üs anenand u a d Gägnerinne z gwöhne, drum heimer dä erst Satz o klar verlore. 

 

När hei mer üs aber em Clöidi ihri Ratschläg z Härze gno u hei mit viu Fröid u Teamgeist witerkämpft, sodass di nächste zwöi Sätz sehr usgliche si gsi u s nach drü Sätz 2:1 für Thun isch gstande. Im vierte Satz heimer churz chli gschlafe u si bim Stand vo ca 19:15 de doch wider dütlech hingedri gsi. Dür wunderschöni Service u viu Kampfgeist hei mer der Satz de gliich no für üs chönne entscheide. 

 

Leider hei mer grad am Afang vom 5. Satz z viu Pünkt abgä, dass mer üs schliesslech 3:2 hei müesse gschlage gä. Gliich darf me uf jede Fau vom ne glungene Saisonstart rede, mir hei Spass gha u guet kämpft u fröie üs iz uf di witere Spiu! Voitto!