> Zurück

Dr negscht 5-Sätzer het nid lang uf schich la wartu

Zeiter Sandrine 17.11.2016

Am 5. November heiwer iisch an iischer erscht Samstagsheimrundi gitroffu und hei d Frouä fam VBC Bödeli-Unterseen empfangu. Beschtens bekannt sind schii isch scho fam Üfstiigsturnier gsi. Wiär hei gwisst, dasses denn än hertä Kampf isch gsi, wawer abr schlussändlich ver iisch hei chännu entscheidu. Das heiwer natirli an dem Samstag nid annersch wellu machu.

 

Satz Nummer 1

Losgleit heiwer wiä d Fiirwehr. Sowohl ver d Züäschauer, wiä öi ver d Spilerinnä näb dum Fäld isch nach dä erschtu 10 Ballwächsel klar gsi: das git hittu än churzi Sach. Schnäll ämal heiwer chännu drfa ziäh und schi nimmä la häre cho. Üs unerklärlichä Gründ siiwer aber plötzlich widr igibrochu. S isch so güät wiä nix meh gangu und Bödeli het chännu üfschliässu. So isch dr klar Satz plötzlich doch nimmä so klar gsi. Schii hennt de nid nur chännu üfschliässu, sondern hennt iisch öi uberholt. Der Schock isch de äs bitz z vill gsi, und wiär hei iisch nimmä wirkli drfa chännu erholu und hei iisch mit 23:25 miässu gschlagu gäh.

 

Dr Zweit

Das chas ja nid sii! Niämerd het gwisst, was mit iisch passiärt isch und was das gnau het sellu. Das heiwer öi nid uf iisch wellu la sitzu. Wiä scho paar Mal dischi Saison heiwer nid bis am Schluss durchgizogu, waswer doch eigentlich chännti. Ziit gsi, das im zweitu Satz z ändru. Also heiwer iisch druf und dra gmacht, iisch widr zrugg z kämpfu. Das isch iisch de öi einigermassu giglückt. Mit güätä Agriffä hiä und da und vor allum am Service vill Druck, heiwer immer widr paar Pinkt chännu machu und hei schlussändlich dr Satz mit 25:22 gigwunnu. Wiiter so!

 

Di Total-Katastropha

Güät, wichtig, dasswer jetz dr Schwung mitnähmä. Isch iisch eigentlich öi rächt güät giglungu. Denn hets än Wächsel gigäh, wa irgendwiä alls durchänand gibrungu het. Nach dem Wächsel siiwer nämli uf z Mal alli falsch gstannu. Wiär hei nimmä gwisst, wer am Service isch, wer wa müäss stah und mu hätti chännu meinu, wiär siigä di gregschtu Afänger. Das het iisch de so dermassu drus gibrungu, dass gad gar nix meh gangu isch. Nach dem dass iisch de d Schriiber schliässlich doch hennt chännu wiiter hälfu, siiwer uf dem Fäld gstannu wiä bstellt und nid abgholt. Wiär hei eigentlich nurnu züäglüägt und sii eifach da gsi, dass 6 ufum Fäld stähnt. Nid erstüünlich, isch das än kläglichä Satz gsi, wawer meh als klar mit 15:25 verloru hei.

 

Abhaggu und nöi startu

Was isch de das gsi? Di Spilerinnä ufum Fäld hetmu quasi nimmä erkennt kä im 3. Satz. Das isch nid nur äs Vopap fa letschts Jahr gsi, sonder fa vorletschts Jahr, wawer quasi nöi gstartut sii. Abr das Vopap, wa de im 4. Satz widr cho isch, isch iisch doch äs bitzji bekannter gsi. Wiär hei iisch widr voll uf iisch konzentriärt, hei Schritt ver Schritt gmacht und Punkt ver Punkt gnu. Än güätä Service hiä, än güätä Agriff da, und scho heiwer widr paar Pinkt meh uf iischum Konto kä. Nid nervös wärdu und bis am Schluss durchziäh isch d Devisa gsi und das heiwer de öi gmacht. Nach dem katastrophalu 3. Satz heiwer iisch also dankemnä 25:22 ins Tie-Break chännu rettu.

 

Dr Schwung mitziäh

Der Schwung wawer de im 4. hei chännu mitnäh het de ditz Mal sogar ver dr 5. glängt. Wiär hei Punkt ver Punkt gmacht, am Service widr meh variiärt, dr Agriff het widr besser gstummu und wiär hei als Team widr funktioniärt. Das het de drzüä gfiährt, dasswer dr letscht nu mit 15:9 hei chännu gwinnu.

 

Fazit

Nach dem Üf-und-Ab ischs wichtig, dasswer iisch jetz widr fäh und znegsch Mal widr besser spilä. Äs fühlt schich zwar a wiänä Niderlag, abr hei, wiär hei gigwunnu! Klar heiwer z Gfühl, dasswer än Punkt abgigäh hei, abr nach 3 Spil mit 6 Punkt da z stah und das als Üfstiiger isch ja öi kei schlächtä Start. :)

 

Mit faner Partie sind gsi: Dave (Coach), Ursi (Captain), Noémi (Libera), Kati, Martina, Eva, Steffi, Maruschka, Sarah, Sandra, Monique, Anja und Sandrine.