> Zurück

Dr zweit 5-Sätzer innerhalb fa churzer Ziit

Zeiter Sandrine 02.11.2016

Am letschtu Donnschtag het iisch dr Wäg nach Schönried gfiährt, wawer uf d Frouä fam VBC Obersimmental gitroffu sii. Nach dä erschtu Spil ischmu doch gspannt, was andri Partiä so ver Üsgäng hennt kä, und so heiwer öi gseh, dass schii iischi altu Bekanntu üs Strättlige ziimli klar gschlagu hennt. Isch ver iisch abr gar kei Grund gsi, scho irgendwiä üfzgäh. Schliässlich hei wiär iisch verbessrut, nu Versterchig bercho und mu weiss natirli öi nid, was bi dem Spil alls gluffu isch. Wiär hei iisch aber sehr uf das Spil gfröit und hei de di läng Autofahrt bis fascht uf Gstaad uf iisch gnu. Obina acho, hennt äs paar fa iisch zerscht mal miässu durchschnüüfu, sindsch doch so kurvigi Strassä nid gigwennt. Wider bi Chräft und pünktlich is de am halbi 9i los gangu.

 

Satz Nummer 1

Im erschtu Satz siiwer gar nid so schlächt gstartut. Hei gad di erschtu Pinkt chännu machu und hei än Minivorsprung erspilt. Der isch aber öi schnäll widr wäg gsi. Nacher is ziimli üsgiglichu gsi. Mal än Punkt ver iisch, denn ver schii, hin und här, bis schii schich hennt chännu absetzu. So siiwer uf z Mal 10:16 im Rückstand gsi. Ziit ver äs Timeout. Das het de öi gnützt und wiär hei chännu üfschliässu, bis dr Gägner bi 18:16 üs ihrusch Sicht het äs Timeout gnu. Bi ihnu hets aber öi leider widr gnützt. Da isch de nid wiiter verwunderlich gsi, dass inä letschtu Ballwächslä öi nu gad alli Timeouts üfgibrüücht wordu sind. Trotzdem heiwer am Schluss knapp mit 22:25 dr Satz verloru.

 

Dr Zweit

Wiär sii dra. Nid nur dra, sondern än Satzgwinn und nu meh ligt durchüs dri. Das het iisch natirli Asporn gigäh ver der zweitu. Und so siiwer de öi gad gstartut. Und siehe da, plötzlich siiwer 8:1 vorüs  gsi. Nach dem hennt d Frouä vam Obersimmutal doch immer widr paar Pinkt chännu güät machu, bis schii uf 14:15 hennt chännu üfschliässu. Wiär hei iisch aber durch das nid la drus bringu und hei niä dr ganz Vorsprung üs dr Hand gigäh, sondern hei nä de widr chännu üsbuu, bis bim 24:18 än Block fam Ursi dr Satz ver iisch entschidu het. Somit heiwer scho dr negscht Satzgwinn chännu sichru.

 

Satz Nummer drii

Der Satzgwinn het iisch ziimli Üftriib gigäh und so siiwer de öi inä drittu gstartut. Wiär sii zwar am Afang nu gliich üf gsi, aber öi hiä heiwer iisch de doch bald ämal chännu absetzu und sowohl im Service wiä öi im Agriff chännu punktu. Punkt ver Punkt siiwer drfa gizogu und hei iisch ditz Mal nimmä la iholu. Wiä dr Zweit, so öi dr Dritt. Nid nur, was dr Sieger abelangt het, sondern öi dr Schlusspunkt. Wiä scho zuvor im Zweitu, het widr z Ursi mitemnä Block dr Satz- und somit Punktgwinn ver dr Üfstiiger gsichrut.

 

Ziit dr Sack züä z machu

Was ver äs Gfühl. Wiär hei scho widr än Punkt gholt. Wiär sii aber hungrig gsi nach meh! Schliässlich hättiwer drmit chännu sichru, dasswer als Üfstiiger fam Spitzuplatz griässä. Wiä gseit: hättiwer. Leider het im viärt Satz nimmä wirkli vill zämugipasst. Di ganzu Pinkt wawer vorer im Agriff odr im Service hei chännu erziilu, sind nimmä cho. Ds einziga, wori wer sehr effiziänt sii gsi, sind d Eigufähler. Äs isch nid so gsi, dass fa dä Gägnerinnä vill meh wäri cho, sondern wiär hei iisch eifach gad sälber gschlagu. Nid verwunderlich heiwer de mit 18:25 dr Satz verloru.

 

De halt im Füftu

Das heiwer natirli nid uf iisch wellu la sitzu. Wiär chännä meh und wellä meh. Und am Afang siiwer eigentlich öi sehr güät gstartut und hei im Tiebreak än chliinerä Vorsprung chännu erkämpfu. Aber wiär hei de dr Schalter doch nid ganz chännu umleggu. So sind de d Obersimmutalerinnä doch widr neecher cho. Nid nur das, schii hennt iisch öi uberholt. Da het de jedes Timeout und jedä Wächsel üsser einzelni Punktgwinn nix meh gibrungu und wiär hei iisch mit 12:15 miässu gschlagu gäh.

 

 

Fazit

Was ver än (unnötigi) Niderlag. Z Spil het zwar unheimlich gfägt, abr nachemnä 2:1 Vorsprung als Verliärer fam Fäld z gah, isch doch sehr bitter gsi. Klar siiwer "nur" dr Üfstiiger und miässäwer nid alls gwinnu, trotzdem wäri jedä Punkt wichtig. Aber äbu, immerhin einä. Wiär chännä üs dem iischi Lehrä ziäh und miässä unbedingt an iischä Eigufähler schaffu. Äs cha nid sii, dasswer plötzlich sonä Hänger hei und iisch nimmä chännä zrugg holu. D negschtusch Chance sus besser z machu, heiwer scho am Samstag am halbi 4i im Altikofu. Da träffäwer uf dr VBC Bödeli-Unterseen, wawer scho fam Üfstiigsturniär äs Bitzji kennä.

 

An discher Stell:

Merci Marc ver z Coaching.

Merci iischum Fan, wa dr lang wäg bis nach Schönried uf schich gnu het.

 

Mit faner Partie sind gsi: Marc (Coach), Ursi (Captain), Kati, Martina, Eva, Steffi, Maruschka, Sarah, Sandra, Monique, Anja und Sandrine.

Abwäsund: Noémi (chrank)