> Zurück

Trainingsspil gägu VBC Burgdorf

Zeiter Sandrine 13.10.2016

Nach dum erschtu Ärnschtkampf gägu VBC Spiez im Cup, heiwer iisch am Zischtag zumnä Vorbereitigsspil in Ittigu gägu VBC Burgdorf gitroffu. Mit dä Burgdorferinnä siiwer uf äs Team gitroffu, wa öi scho letschts Jahr iner 3. Liga gspilt het. Also äs Spil, wa doch äs bitzji wägwiisund chännti sii. Sehr motiviärt und fascht vollzählig heiwer iisch also z Ittigu gitroffu.

Pünktlich am viertel ab 8i ischs de mit Ischlah losgangu. Da heiwer bald ämal gmerkt, dass fa iischä Gägnerinnä einiges z erwartu isch. Aber öi wiär hei scho wellu zeigu, waswer chännä. Nach der Viertelstund is de öi losgangu und s isch zum Match agipfiffu wordu. Im erschtu Satz siiwer ziimli güät gstartut. Hei vor allum mit dum Service vill Druck chännu machu und hei somit verhindrut, dass iischi Gägnerinnä zu güätä Agriff sind cho. Bi ihnu het aber am Afang öi nid wirkli vill zämugipasst. Aber öi schii sind de langsam besser ins Spil cho und hennt genau so mitem Service chännu Druck machu. Aber wiär sii öi widr inäs alts Muschter kiit und hei äs chliis Teif kä. Trotzdem heiwer iischä Vorsprung chännu phaltu und hei so dr Satz mit 25:21 beändut.

 

Wills ja äs Trainingsspil isch gsi, isch das öi dr Mumänt gsi, z eint odr andra üszprubiäru. So sind also ver der zweit Satz äs paar Änderigä vorgnu und d Hälfti fam Team üsgwäxlut wordu. Da teilwiis Liit zämu gspilt hennt, wa nu niä zämugspilt hennt, und öi z Timing mit dr Passeuse - nach langer Pause widr im Isatz - widr het miässu gfunnu wärdu, isch am Afang doch ziimlichi Hektik ufum Fäld gsi. Iischi Gägnerinnä hennt das gnadulos üsgnutzt und sind mit dumnä Vorsprung fa meh als füüf Punkt ins erscht Timeout gangu. Das heiwer aber nid uf iisch wellu la sitzu. Z Zämuspil het je länger je besser giklappt und wiär sii ändlich öi ins Spil cho. Punkt ver Punkt heiwer gmacht, d eint oder anner Varianta üsprubiärt - und wiä das funktioniärt het!! - und hei langsam üfgholt. Bim Stand fa 23:24 üs iischer Sicht, heiwer mitemnä Ass chännu zum Üsgliich punktu. Gad än wiiterä güätä Service hinnina nah het de zum Satzpunkt ver iisch gfiährt. Hei aber doch numal miässu dr Service abgäh. Am Schluss heiwer aber dr Närvä chännu phaltu und hei öi dr zweit Satz mit 27:25 ver iisch entschidu. Was ver än Üfholjagd! Das het soagr dr Marc beidruckt - Uberraschig folgt schiins nu ;)

 

Im drittu Satz siiwer de widr genau so schlächt gstartut, wiä im zweitu, wenn nid sogar nu äs bitzji schlächter. Öi hiä heiwer iisch aber widr zrugg gikämpft. Hei zwar äs paar güäti Agriffä chännu machu, hei aber vill z vill Servicefähler gmacht, und sii öi iner Anahm gad nimmä so konstant gsi. Das alls het drzüä gfiährt, dass schich iischi Gägnerinnä das Mal nid hennt la iholu, und mit 25:18 zum 1:2 hennt chännu üfschliässu.

 

Nu lang kei Grund, jetz dr Chopf inä Sand z stecku. Isch eifach än schlächtä Satz gsi, aber dr Match isch ja wägu dem nid verloru. Drum heiwer de im viärtu Satz öi widr meh wellu. Mit einigä Wächslä hets de im viärtu fa Afang a gad widr besser gipasst. Wiär sii bald ämal drfa gizogu und hei iisch nimmä la stoppu. Öi Wächslä währund dum Satz uf iischer Siita, hennt iisch nimmä gstoppt und wiär sii bis zum 25:15 drfa gizogu.

 

Fazit

Wiär hei also das Trainingsspil mit 3:1 ver iisch chännu entscheidu. Wiär tärfä aber jetz uf kei Fall uberhäblich wärdu. Schliässlich sind schii anschiinund nid ganz komplett gsi, und öi bi iisch het doch nu nid alls perfekt gstummu. Jetz heiwer aber das Wuchunänd Ziit in Mürre am Fiinschliff z schaffu, und öi ich cha mi ändlich widr ins Team iglidru :D.

Ich bi sehr züäversichtlich ver di Saison und bi sicher, dasswer öi an dem Wuchunänd nu paar Fortschritt chännä machu. :) Am Samstag heiwer de zer Standortbestimmig äs interns Duell gägu d Damä faner 3. Liga A. Und da bini doch sehr gspannt.

 

An discher Stell:

Merci Jasä ver z Pfiffu und Gratulation zur bestandnig Prüffig :)

Merci Marc ver z Coachu. :) Wiär sii scho gspannt uf d Uberraschig ;)

Merci dä Gägnerinnä, wa schich zu dem Trainingsspil bereit erklärt hennt. Wer weiss, vellicht träffäwer ja iner zweit Rundi fam Kantonalcup ufänander.

 

Mit faner Partie sind gsi: Marc (Coach), Sarah (Assistänzcoach, Statistikerin - verletzt), Ursi (Captain), Kati, Martina, Noëmie, Steffi, Maruschka, Anja, Sandra, Monique und Sandrine.