> Zurück

D Siegesserie fanä Damä 2 geit wiiter :)

Zeiter Sandrine 26.02.2016

Vor derä Wucha heiwer iisch z Frutigu gitroffu, ver iischi Siegesserie fortzsetzu. Zu dem Ziitpunkt isch Frutigu tabällumässig ziimlich wiit vorna gsi. Wiär hei also gwisst, dasses nid än Sälbschtlöifer wird sii. Voll motiviärt heiwer also iner Turnhalla mit dum roserotu Bodu agfangu ispilu und ischlah. Fa iischä Gägnerinnä isch zu dem Ziitpunkt doch scho einiges cho. Wiär sii ziimli gspannt gsi, was de währund dum Spil chunnt und hei de dr Match pünktlich chännu afah.

Dr erscht Satz isch de ver iisch doch äs bitz uberraschund gsi. Fa iischä Gägnerinnä isch ziimli vill Druck cho. Sowohl im Agriff als öi im Service hennt schii doch einiges meh gizeigt als im Spil iner Vorrundi. Vor allum uber d Mitti isch sehr vill Druck cho. Aber öi uber d Üssuposition hennt schii äs paar güäti Pinkt chännu verbüächu. Iischers Spil isch zu dem Ziitpunkt nu derzüä giprägt gsi fa Fähler. Trotzdem heiwer gägu Schluss fa dem Satz widr chännu züäleggu, s het aber de doch nid glängt und wiär hei der erscht Satz mit 22:25 an iischi Gägnerinnä miässu abgäh.

Wiär hei aber dr Chopf nid la hangu. Schliässlich heiwer unbedingt wellu 3 Pinkt holu. Mit grosser Unnerstützig uf dr Bank siiwer de richtig heiss inä zweit Satz gstartut. Und wiä d Fiirwehr heiwer losglah: Am Service isch fa iischer Siita doch einiges meh an Druck cho, so dass iischi Gägnerinnä nimmä so zum Abschluss sind cho, wiä im erschtu. Dadurch hei de öi wiär paar schöni Pinkt im Agriff chännu verbüächu. Der Satz als Ganzus gseh isch aber eigentlich fascht nur durch Service giprägt gsi. Zum Schluss hei de wiär meh Druck drmit chännu machu und so dr Satz mit 25:16 ver iisch chännu entscheidu.

Voll motiviärt siiwer de öi inä drittu gstartut. Am Afang siiwer immer ziimli gliich üf gsi. Iisch sind widr meh Eigufähler unnerluffu. Hei iisch aber gägu Mitti Satz widr gfangu und ab da immer äs bitz chännu vorleggu. Uf der gägnerisch Siita het mu gmerkt, dass d Üsdüür äs bitzji nahlaht. Äs isch zwar doch nu dr eint oder anner schön Agriff cho, aber doch einigi weniger als im erschtu Satz. Di paar Pinkt Vorsprung heiwer de bis zum Schluss chännu üfrächt haltu und hei so öi dr dritt Satz mit 25:20 gigwunnu.

Fählt also nurnu 1 Satz ver di negschtu 3 Pinkt z holu. Wiär sii top motiviärt gsi, was schich - wiä scho in Satz 2 und 3 - iner güät Stimmig uf und näbu dum Fäld gizeigt het. Hei äs paar schöni Pinkt chännu machu, und öi dr Block het ändlich besser gipasst. Lang is äs Chopf-an-Chopf-Rennu gsi, mit dum besseru Ändi ver iisch. Mit dumä wunderschönu und perfektu Block heiwer de öi dr viärt Satz mit 25:21  und somit z ganz Spil und di vollu 3 Pinkt chännu ifahru - zum Leidwäsu fa dä ganzu Frutiger-Fans und zer Freid fa iischä 3 mitgreistu Fans und dum ganzu Team.

 

Fazit: Wiär hei zwar nid so güät gstartut und iisch am Afang vellicht äs bitzji la uberfahru. Wiär hei iisch abr rächt schnäll chännu fah und hei d Motivation und öi dr Siegeswillu chännu finnu. Jetz fählund iisch ver d Sicherig fam zweitu Platz nu 3 Pinkt in 3 Spil. Wobii dass z Ziil sicher meh Pinkt sind. Schliässlich stähnt nu zwei Revanges üs. Eini drfa findut moru am 6i im Altikofu statt. Wiär würdi iisch sehr uber grossi Unnerstützig fa ewer Siita fröjiu.

 

Wiä immer:

Merci Marc ver diis super Coaching. Dü hesch iisch mal widr so richtig chännu motiviäru! :)

Merci iischä tröischtu Fans! Äs isch wirkli immer super, finnät iähr immer widr dr Wäg ind Halla :)

Merci dum Schidsrichter ver z Pfiffu :)

 

Mit faner Partie sind gsi: Marc (Coach), Ursi (C), Kati, Martina, Eva, Sarah, Fibä, Monique, Anja und Sandrine.