> Zurück

Schwarzä Sunntag

Zeiter Sandrine 26.11.2015

Ja, ditz Mal is bsunders lang gangu, bisi mi drzüä hä chännu bewegu, der Bricht z schriibu. Und eigentlich wellti öi nid all zu vill Wort druber verliäru.

Ja, wiär sii z nervös gsi (22:25). Ja, wiär hei z vill wellu (23:25). Ja, wiär hei befriiter gspilt (9:0), wa klar isch gsi, dasswer ganz sicher nimmä chännä 3 Pinkt holu (25:20). Ja, wiär heis im entscheidundu Mumänt vertublut und nu drzüä Päch kä (27:29).

Fazit: Ds Saisonziil wird mal zrugg gsteckt. Wiär miässä iisch wider druf konzentriäru, dass Volleyball schlussändlich doch eigentlich sellti Freid machu und wer nid zu verbissu sii. Und wer weiss, vellicht hets ja genau sonä bitteri Niderlag gibrüücht, ver iisch widr uf iisch z konzentriäru. Z Training am Zischtag het ämel di Freid, wa mal isch da gsi, di Glassuheit und das Zämuspil and Oberflächi gibrungu und wiär sii mit dumä güätu Gfühl Heim gangu.

 

Der negscht Match findut de moru am 20:45 im Rain in Ittigu statt. Und ich deichu, nei, ich bi mer sicher, dasswer an di Freid fam Zischtag chännä achnüpfu und eifach tiä Volleyball spilu.

 

Merci Marc, bisch dü bereit gsi, diini Närvä ver iisch z opfru. Merci öi dum Assistänzcoach, ver diini Unnerstützig.

Merci vor allum aber öi dä villu Fans, wa iisch an dem Sunntagabund unnerstützt hennt und ihrusch Ziit liäber mit dumä närvuüfriibundu Spil verbrungu hennt, als gmiätlich Däheimu z sitzu und der Abund z gniässu. :)

 

Mit faner Partie sind gsi: Marc (Coach), Tino (Assischtänzcoach), Ursi (C), Phung (Libera), Kati, Martina, Eva, Steffi, Sarah, Monique, Natalija, Anja und Sandrine.