> Zurück

Versöhnlichä Vorrundu-Abschluss

Zeiter Sandrine 15.12.2014

Match fam 12.12.14:

Am letschtu Fritag hets ver iisch zum letschtu Mal iner Vorrundi gheissu: sexy pliibu und gniässu. Durch di klar Steigerig inä letschtu paar Spil - wawer sogar z eint odr andra hei chännu gwinnu - isch iischers Ziil sicher klar gsi: wiär wellä das wichtig 6-Punkte-Spil gägu VBC Köniz b, wa iner Tabälla diräkt hinner iisch isch gsi, unbedingt gwinnu. Ufgrund faner personell Situation (fa 4 Mittinä isch nur gad eini da gsi), heiwer gwisst, dasses sicher nid eifach wird, das Vorhabu ini Tat umzsetzu. Dank der hilfriich Unnerstützig fa iischer bisherig Trainings-Juniorin (merci Sarah!), heiwer iisch aber nix la amerku.

 

Bim Iträffu fanä Gägnerinnä sind villi fa iisch schomal uberrascht gsi. Wägum Vorbereitigsspil gägu VBC Köniz, siiwer der Meinig gsi, dass iisch de di gliichu Gägnerinnä wiä denn erwartund. Wawer aber de keis bekannts Gsicht gseh hei, isch bald ämal ver alli klar gsi, dass das nid di gliichu sind, sondern Spilerinnä fam VBC Köniz b. Durch ihrusch Üfträttu und nach dum Ischlah, heiwer alli gideicht, dass de das nid sonä klari Sach wird gäh und wer iisch der Siig sicher miässä erkämpfu.

De siiwer de inä erscht Satz gstartut. Der isch ganz churz zämugfasst ziimlich üsgiglichu gsi. Mal der eint oder anner Punkt ver schii, de widr ver iisch und so is immer wiiter gangu. Willwer iisch alli niä hei lah üs dr Rüäh bringu und de doch äs paar schöni Pinkt meh hei gmacht, heiwer der erscht Satz mimnä Service-Winner mit 25:22 chännu abschliässu und ver iisch entscheidu.

Plötzlich isch der Druck, wa scho so nid so starch uf iisch glaschtut het, komplett verflogu gsi. Im zweitu Satz isch iisch sehr vill glungu und dä Gägnerinnä nid wirkli. Mit druckvollä Service und Agriffä fa iischer Siita und Unsicherheitä iner Üfstellig bi dä Könizerinnä, isch der zweit Satz mit 25:17 an iisch gangu.

Der dritt Satz cha eigentlich nu chirzer zämugfasst wärdu: Kati: 1 - VBC Köniz b: 0. Mit derä unglöiblichu Aspil-Serie faner Kati, heiwer ziimlich schnäll ziimlich vill Vorsprung kä. Will faner anner Siita in der Phasa gar nix isch zrugg cho, siiwer de doch nu uberrascht wordu, wa plötzlich mal widr alli fa iisch hennt tärfu ins Spil igriifu. So is de passiärt, dasswer zum Teil nimmä so konzentriärt sii gsi und dr eint oder anner Eigufähler meh hei gmacht. Wiär hei iisch aber trotz allum nid üs der Rüäh la bringu und mit einzelnä Varianta nu paar schöni Pinkt chännu machu. Drum heiwer de öi dr dritt Satz mit 25:17 und somit das Spil ver iisch chännu entscheidu.

 

Ver Vopap hennt gspilt: Rebecca Bissig, Eva Mosimann, Monique Nissille, Sandra Rölli, Linda Schächtele, Katrin Siegenthaler, Phung Vo, Sarah Walther, Sandrine Zeiter

 

 

Rück- und Üsblick:

Ich wellti hiä nu gad än churzi Zämufassig faner Vorrundi machu. Wiär sii mit sehr hochä Erwartigä an iisch sälber in di neu Saison gstartut. Vellicht sind di äs bitzji z hoch gsi und wiär hei iisch so sälber unner Druck gsetzt, was nid netig wäri gsi. Trotz dä Startschwirigkeitä heiwer iisch chännu steigru und zeigu waswer eigentlich chännä. Äs wird sicher allnä fa iisch dr eint oder anner Ballwäxel nu lang in Erinnerig pliibu - gäll Ursi ;) - und di güätu Erinnerigä welläwer unbedingt ver d Rückrundi mitnäh. Mittlerwiilu gsehts zwar Tabällu-mässig nimmä ganz äso düschter üs wiä nach dä erschtu paar Spil, aber mit dum 5. Platz nach der Vorrundi, siiwer sicher nid wirkli zfridu. Iischers Ziil - unner di erschtu 3 z cho - heiwer sicher nu im Öig und ich bi fescht drfa uberzigt, dasswer das öi chännä schaffu!

Wiär miässä lüägu, dasswer di güätu Sachä biiphaltä und anä weniger güätu wiiterhin schaffä. De bini ziimlich sicher, chunnt das ver d Rückrundi güät!

Jetz isch aber zerscht mal Erholig agseit und ich glöibu, di heiwer öi dringenscht netig. De chännäwer de widr mit vollum Elan ind Rückrundi startu und iischi Plän hoffuntlich öi ini Tat umsetzu.

 

 

Grossus Dankeschön:

An der Stell wellti nu dum Rebi danku, wa iisch leider nach der Vorrundi in Richtig Schwyz verlaht. Ich hoffu dü hesch an dem Abschids-Gscheich mit dum 3:0 - Siig Freid! Merci ver diinä Isatz und di schönu und luschtigu Mumäntä mit diär! :)

Äs riisu grossus Merci öi iischä tröjiu Fans - allnä vora dr Julie - wa iisch immer tatchräftig unnerstützund und öi inä schwirigeru Mumäntä bi iisch sind giplibu! Merci vill vill mal!!

Wiär wünschä ew allnä än schöni Wiähnächtsziit, än güätä Rutsch und hoffä, ew öi iner Rückrundi widr z gseh! :)