> Zurück

Di nöii Saison cha cho

Heller Naomi 19.09.2018

Am Samsti si mir z Aarberg mit em Vorbereitigsturnier i di nöii Saison gstartet. Chli meh aus e Monet vor em Afang vor Meisterschaft hei mer z erst Mau i der nöie Konstellation zämegspiut u grad aus ersts gäge hertist Gägner dra müesse. Aarberg isch ir U23 1 u entsprächend hei si o gspiut, mir si no nid ganz parat gsi, hei üs a nöii Positione müesse gwöhne u hei viu z weni kämpft. 

Im Verlouf vo de nächste zwöi Matchs gäge chli eifacheri Gägnerinne si mer aber immer besser ids Spiu cho, üses Zämespiu het viu besser afah klappe u mir hei schöni Pünkt gmacht, meh gfightet u Fröid gha. So hei mer zersch Thun-Strättlige u när o no Kehrsatz chönne bezwunge hei u hei schliesslech ds Turnier ufem 2. Rang chönne beände. Mir hei dank em Turnier aus Team (wider) zämegfunde, üs i drü Matchs scho dütlech chönne steigere u si ize parat für aues, wo i de nächste Mönet chunnt. Mir fröie üs uf di Saison! Voitto!  

D Melike u d Alissia hei leider nid chönne cho, gspiut hei auso: Vanessa, Michèle, Leila, Naomi, Melina, Joy, Vivienne sowie üsi Nöizuegäng Lea und Ana